ဘတ်စ်ကားပေါ်မှာ သူမနှင့် နောက်ထပ်ခရီးသည် ၁ ဦးပဲကျန်တော့ တာသတိပြုမိချိန်မှာ
အိမ်ရောက်ဖို့ ၎ မှတ်တိုင်လောက် လိုသေးသည်။
သူမက ဘတ်စကားစီးရင် စာဖတ်နေတတ်တာမို့ မှတ်တိုင်ကျော်မသွားစေရန်သတိထားပြီး
မကြာမကြာ အပြင်ကို ကြည့်ပေးရသည်။
ရှေ့ တမှတ်တိုင်မှာ နောက်ဆုံး အဖော်ခရီးသည် ဆင်းသွားပြန်သည် ။
အိမ်ရောက်ဖို့  ၂ မှတ်တိုင်အလိုမှာ ခရီးသည်ဟူ၍ သူမတယောက်တည်း ၊သူမ ပြုံးလိုက်မိသည် ။
ဘတ်စ်ကား ကြီးတစ်စီးလုံး ကိုယ်တယောက်တည်းစီးလာရတာ ရယ်စရာ။ဘတ်စ်ကား လုံးချင်းငှားတာပေါ့ ။ အပြင်မှာက မိုးမှောင်ကျနေသည် ။
စာအုပ်ကို သိမ်းရန် ကတ်ပြားလေးကို ဖတ်လက်စစာမျက်နှာမှာ ညှပ်လိုက်သည်။
သူမက စာရွက်ကိုခေါက်ပြီးမှတ်တာလုံးဝမကြိုက်သူမို့  ဖတ်လက်စ စာမျက်နှာမှတ်ရန် ကတ်ပြားလှလှလေးတွေဆောင်ထားတတ်သည်။
စာအုပ်ကိုပေါင်ပေါ်က ဘေးလွယ်အိတ်ထဲ ထည့်သိမ်းအပြီးမှာဘယ်ဘက်မျက်နှာနား အေးခနဲ ဖြစ်သွားတာ ခံစားလိုက်ရသည်။ aircon ကအေးသလိုမျိုးမဟုတ်ဘဲ မျက်နှာတဝိုက်မှာပဲ စိမ့်ကနဲ ဖြစ်သွားကာ လည်ဂုတ်တွေမှာပါ ကြက်သီးများထသွားသည်။ သူမကရှေ့ သို့ ပုံကျနေသော ဆံပင်အခွေများကို
နောက်သို့ စုတင်လိုက်ရင်း ဘေးဘီကိုလှည့်ကြည့်သည် ။ သူမနားမှာ မြူတွေ ဆိုင်းနေသလိုလို ။
သူမထိုင်ရာမှ ထလိုက်ကာ အရှေ့ ဘက် တံခါးပေါက်နား ကထိုင်ခုံကို ပြောင်းထိုင်လိုက်သည် ။ ဆင်းရတော့မှာပဲလေ ။ ခဏနေတော့ကြက်သီးတွေ ထသလိုဖြစ်လာပြန်သည် ။ အေးလိုက်တာ ။
ရုတ်တရက် ကျောပေါ်မှ သူမဆံပင်ခွေတခွေက အရှေ့ ကို ကျလာသည် ။ သူမလန့် သွားသည် ၊ ဘေးနားမှာမြူတွေလိုလို အငွေ့ တွေ ဝိုင်းနေပြန်ပြီ ၊
သူမ မနေနိင်တော့ ချက်ခြင်းထ ကာ ကားမောင်းသူ နားလျှောက်သွားလိုက်သည် ။

Bus Captain တရုတ်ဦးလေး ကြီး နားရောက်တော့ နောက်လှည့်အကြည့်လိုက်မှာ ရင်ထဲကျဉ်ခနဲဖြစ်သွားရသည် ။ သူမထိုင်ခဲ့ သော နေရာနားမှာ ရပ်နေသော ပုံရိပ၊်
မြူတွေလိုပဲ မကွဲပြား ဒါပေမယ့် သူမကို လှမ်းကြည့်နေသည့် လူလိုလို သဏ္ဌာန်
ဆိုတာ ကတော့ အသေအချာပင်။

“ ဘာလည်း မိန်းကလေး “ ကားမောင်းသူ ဦးလေးက မေးသည်။

“ အန်ကယ် အနောက်မှာ တခုခုပဲ “

“ ဘာလည်း ဟင် “ ထိုစဉ် ကားက မီးပွိုင့်မှာ ရပ်လိုက်သည် မို့ ကားမောင်းသူ ဦးလေးက
နောက်ကို လှည့်ကြည့်သည် ။

“ ဘာမှလည်း မရှိပါလား ဘာလို့ လည်း Miss ရဲ့ “

ဟင် ၊ ဘုရားရေ သူမကို စိုက်ကြည့်နေသော ထိုဖြုဖြူ အငွေ့ သဏ္ဌာန်ကို ထိုဦးလေး မတွေ့ ဘူးလား ။

“ ဟိုမှာလေ ၊ အန်ကယ် ၊ အနောက်မှာလေ .. အငွေ့ တွေ သရဲလို ပဲ .. “

သူမက ပြောရင်း ထိုသဏ္ဌာန် ကို ကြည့်မိပြန်သည်။ သူမကို စိုက်ကြည့်နေတဲ့ အငွေ့ တွေက ပျောက်ပျယ်မသွားပါ။ပိုတောင်ပီပြင်လာသလို လို။

“ သရဲလိုပဲ ဟုတ်လား ၊သရဲလိုပဲတဲ့ ၊ သရဲလိုပဲတဲ့ .. ဟားဟား “

“ ဟင်“ သူမက ထိုအငွေ့ သဏ္ဌာန်ကို စိုက်ကြည့်နေရာမှာ Bus Captain ၏ ထူးခြားသောရယ်သံကြောင့်
သူ့ ကို ပြန်လှည့်ကြည့်မိသည် ။

“ ဘုရား ရေ“ ၊ Bus Captain လူကြီးက ဟားတိုက်ရယ်မောနေပါလား ။

သူ့ ကိုလှည့် ကြည့်လိုက် မှ ထူးခြားမှုတခုကြောင့် သူမ ရင်တွေပွင့်ထွက်တော့မည့်အတိုင်း နှလုံးခုန်သံအလွန်မြန်လာသည်။
သူမက နှလုံးသား ပါးစပ်ကခုန်ထွက်သွားမှာစိုးသည့်အတိုင်း သွားကို တင်းတင်းစေ့ထားမိလိုက်သည်။

Bus Captain ဦးလေးက ခွက်ထိုးခွက်လှန်ရယ်မောနေရင်းမှ တရုတ်ကြီးကနေ၊ မလေးလူကြီး ဖြစ်သွားသည် ။ နောက်တရုတ်လူငယ်ဖြစ်သွားပြန်သည် ၊ နောက် ကုလားလူငယ်ဖြစ်သွားလိုက် ၊ အစောက တရုတ်ဦးလေးပြန်ဖြစ်သွားလိုက်နှင့် အမျိုးမျိုးပြောင်းနေတော့သည်။

သူမသိလိုက်ပြီ တခုခုမက မှားယွင်းနေလေပြီ ။
သူမစိတ်ကို ထိန်းကာ နောက်မှတ်တိုင်မှာ ဆင်းမည့် ခလုတ် နှိပ်လိုက်သည်။
Bus Captain ကို ကျောခိုင်းပြီး ရှေ့ ပေါက်မှ မဆင်းရဲတော့ သည်မို့  အလည်ပေါက်ကို ဘေးတိုက် အတိုင်း အသာလေးလျှောက်သွားသည် ။ အနောက်က အငွေ့ သဏ္ဌာန် ကလည်း ထိုအတိုင်းပဲရှိနေသည်။
ကားက မှတ်တိုင်မှာရပ်လိုက်သည် ။ သူမ အိမ်နားလည်းမဟုတ်ပါချေ ။ ဘယ်ကိုရောက် နေပြီလည်း ဘယ်ကိုရောက်ရောက် .. အခုနေ ထို ဘတ်စ် ကားပေါ်မှဆင်းရင် ပင်လယ်ပြင်ထဲရောက်မည် ဆိုတောင် သူမဆင်းဖြစ်မည် ထင်သည် ( သူမရေကူးမကျွမ်းကျင်ပါ )။ ဘတ်စ်ကားကမှတ်တိုင်မှာ ရပ်ပေမယ့် တံခါးဖွင့်မပေးပါ ။ သူမတံခါးကို တွန်းလိုက်သည် ။တံခါးပွင့်မသွား ။
ကားမောင်းသူဖက်လှည့်ကြည့်လိုက်တော့ နေရာမှာ ဘယ်သူမှမရှိတော့ပေ။
ကားတခုလုံး အငွေ့ တွေဖုံးနေပီ .. အနောက်ဖက်က အငွေ့  က သူမနားရောက်လာပြီလား ..
အရှေ့ က ရော အနောက်ကရော မြူုခိုးတွေ ပြည့်သိပ်လာသည် ။
သူမဘာကို မှ သဲသဲကွဲကွဲ မမြင်ရတော့ပါ တံခါးကို ဆောင့်ကန်သော်လည်းမပွင့်
နှာခေါင်းထဲမှာ အငွေ့ တွေ ရှုရှိုက်မိသလို ...
လေတွေက အေးစက်နေသည်၊ အသက်ရှုရအလွန်ကြပ်လာသည် ၊
ငါ့ကို သေအောင်သတ်တော့ မှာလား ၊ သရဲခြောက်နေပြီ။
ငါဘယ်ကို ပြေးရမှာလည်း ၊ ဘတ်စ်ကားသည်အလုံပိတ်လျှက် ။
သူမအားနှင့် မှန်ကိုလည်းမခွဲ နိုင်ပါချေ။
နောက်ဆုံးတော့ သူမလုပ် နိုင်တာကဘုရားစာရွတ်ဖို့ ဖြစ်သည်။
ဘုရားစာ.. ဟင် .. ဘုရားရေ ..သူမ ဘယ်ဘုရားစာမှ မရတော့ ပါလား ။
အမြဲလို ရွတ်နေကြ ပုရိတ်ကြီး ၁၁ သုတ် .. မေတ္တာသုတ် ၊ ဂုဏ်တော်ကွန်ချာ ၊ ပဋ္ဌာန်းပစ္စယုဒ္ဒေသ
ဘာဆိုဘာမှ မရတော့ပါလား .. အစလေးတောင်မသိတော့ ..။
သေချာပြီ။ သူမအကြောက်လွန်နေလေပြီ။
ကြောင်တွေ အကြောက်လွန် လျှင် ကန်းသလိုပဲ သူမလည်း ကန်းနေလေပြီ။
သူမစိတ်မထိန်းနိုင်ရင် အရှူံးနှင့်ရင်ဆိုင်ရတော့မည်။
ရုန်းရင်းဆန်းခတ် တံခါးကို ကန်နေတာရပ်၍ စိတ်ထိန်းပြီး
သူမ ဘတ်စ်ကားကြမ်းပြင်ပေါ်ချက်ခြင်းထိုင်ချလိုက်သည်။
မျက်စိကို စုံမှိတ်လိုက်သည် ။ အသက်ကိုမှန်အောင်ရှူသည် ၊အေးစက်သော အငွေ့ တွေ
နှာခေါင်းထဲသို့ ဝင်လာပြန်သည် ဝင်ပစေ ..ဝင်ပစေ။ သူမ နားမှာ မြူခိုးအေးစက်တွေဖိကြပ်လာသည် ။
စိတ်ထိန်းထား .. စိတ်ထိန်းထား မဟုတ်ရင်နင်ရူးလိမ့်မယ် .. ထိန်းထား ..
နောက်ဆုံးမှာတော့ သူမ နေ့ တိုင်းရွတ်နေကြ ပဋ္ဌာန်းကို သတိရလာပြီ။
အသံကိုထိန်းကာ .. တံခါးကို အာရုံပြုကာ ရွတ်လိုက်သည် ။

“ ဟေတုပစ္စယော တိ ဟေတူ ဟေတု သမ္ပယုတ္တကာနံ ဓမ္မာနံ
တံသမ္ပယုတ္တကာနဉ္စ ရူပါနံ ဟေတုပစ္စယေန ပစ္စယော“

ထိုစဉ် .. ဘတ်စ်ကား တံခါးက ကျွီခနဲ ပွင့်သွား ..။

“ အငယ်လေး .. အငယ်လေး .. အိမ်မက်ဆိုးမက်နေတာလား .. မလန့် နဲ့ လေ “